少年成長今日: 2|主題: 15861

收藏本版

回覆發帖

返回列表

跳至頁

查看: 23541 | 回覆: 1

去邊度玩？ [複製鏈接]

csir3290

子爵府

積分: 11009

1^#

發表於 24-1-14 12:11 |只看該作者 |倒序瀏覽 |打印

早幾日同啲舊同學飯聚，除咗懷緬過去讀書嘅美好時光之外，當然最主要嘅話題都係講仔女，其中有個當年算係好玩得四圍蒲嘅同學仔，自從做咗老豆幾年，佢話一放假就要諗下同佢個仔去邊度玩就覺得好煩，佢話好似當年同佢老婆拍拖嘅時候一樣，成日都要諗吓同個仔去邊度玩，佢話乜嘢主題公園都去過曬，喺網上面一睇到有啲乜嘢親子玩樂嘅新地方介紹，佢又會第一時間去試，總之佢就想成日同個仔去唔同地方玩。咁我哋傾開我話當年我阿仔阿女幾歲嘅時候，其實我都有遇過呢個問題，總之一放假就想陪佢哋去玩，但係好多地方都去過又唔知去邊好，去得多嘅地方又驚佢哋會悶冇咗新鮮感，我記得當年乜嘢主題公園嘅年票都試過買，總之買咗之後就成日去玩所以都覺得抵嘅，但係慢慢又會諗下成日都係去嗰啲地方好似好悶咁。

上面嘅情況可能有啲家長都會遇過，我自己就好快諗通咗，因為重點唔係去邊度玩，重點反而係當你同細路仔去玩嘅時候，無非都係想同佢哋相處多啲，但係究竟呢啲相處嘅時間係咪一啲優質嘅相處時間呢？呢個先至係最重要嘅問題。好似我自己對仔女，佢哋細個嘅時候，我發覺佢哋原來最鍾意嘅都係落樓下公園玩，咁好多時我同老婆放工返到屋企，佢哋就想我哋帶佢落去公園玩，因為佢哋最鍾意嘅並唔係個公園，而係我哋做家長嘅同佢哋一齊玩，我發覺只係隨隨便便咁扮捉下佢哋，佢哋已經笑到唔停到嘴，嗰種嘅笑法完全係發自內心嘅開心。我都曾經喺佢哋細個嘅時候問過佢哋最鍾意去邊度玩，原來佢哋都係話同埋爸爸媽媽落去公園玩嘅時候最開心，地點並唔係最重要，最重要係嘅係我哋有冇同佢哋一齊玩。

所以我都同個同學仔講話唔好煩惱同仔女去邊度玩，不如諗下同佢哋玩嘅時候係咪真真正正同佢哋一齊玩仲好，如果每次帶到佢哋去玩嘅地方，都係由得佢哋自己玩，父母只係就咁睇住佢哋，甚至乎自己只不過喺度睇電話或者只係顧住同其他家長傾計，完全同個細路仔冇乜嘢互動，由得佢哋自己玩，咁當然玩下玩下就會厭啦！我同佢同我講話最辛苦唔係諗同佢哋去邊度玩，最辛苦反而係同佢哋一齊玩，因為細路仔好似有用唔完嘅氣力，但係我哋就年紀大，跑兩下已經喘氣。所以我話與其成日諗同佢哋去邊度玩，不如用多啲心機諗下點樣同佢哋一齊玩好過。我話與其擔心仔女對玩嘅地方缺乏新鮮感而成日要諗點樣畀新鮮咁佢哋，不如諗下點樣畀一個優質嘅相處時間佢哋仲好。細路仔好易滿足，只要父母同佢哋一齊玩，其實佢哋已經好開心，重點唔在於係邊度玩而係有冇一齊玩。講就好似係一個好顯淺嘅道理，但係做起上嚟其實並唔係個個父母都做到。好多父母都會同細路仔去公園玩，但係只不過係畀佢哋自己玩。相反如果襯佢哋細個能夠同佢哋一齊玩，就好容易做到一個優質嘅相處時間。到而家我自己對仔女開始大咗，佢哋未必再鍾意去公園度玩，但係因為自細同佢哋打好咗個底，所以就算只係簡簡單單出街食餐飯或者出去行下街，其實大家都會好多嘢講好多嘢傾。所以重點並唔係成日要諗究竟點樣有一處優質嘅相處地方，而係要諗點樣同仔女可以有一個優質嘅相處時間。