少年成長今日: 2|主題: 15861

收藏本版

回覆發帖

返回列表

跳至頁

查看: 20937 | 回覆: 1

唔公平 [複製鏈接]

csir3290

子爵府

積分: 11009

1^#

發表於 24-2-4 11:04 |只看該作者 |倒序瀏覽 |打印

前兩日阿妹打電話畀我同我呻，佢話佢阿仔喺學校畀人打，但係因為佢阿仔都有還手，所以學校就兩個同學仔都一齊記咗個小過。佢話發生呢件事學校都有即刻通知佢，佢去咗學校之後，老師就解釋因為兩個同學都有郁手，由於發生呢件事嘅時候亦都冇同學睇到，所以學校最終因為兩個同學都有出手而兩個同學都記咗小過。我妹話當時都接受，因為事實佢個仔都有出手。但係返到屋企之後，聽返阿仔講佢話件事其實係打佢嗰個同學根本就一向都針對同唔鐘意佢，嗰日呢個同學突然間沖埋嚟推咗我個姨甥一下，所以佢先至因為自衛而推開佢，我呀妹話佢阿仔覺得好唔抵，明明係個同學出手先，佢只不過係自衛，佢仲話唔通任人打都唔還手咩！我呀妹話而家個仔覺得好唔抵又覺得阿媽唔幫佢，所以問我好唔好返去學校同返佢啲老師講，幫佢個仔上訴。

我話我都明白件事對阿仔嚟講係覺得好唔公平，明明係人哋出手先，自己都要受罰所以覺得唔公平。但係我都同我妹講話其實成件事因為佢阿仔都有出手，所以其實自己都有啲理虧。因為而家其實係各有各講，正如對家個細路仔返到屋企都會同自己嘅家長講話我個妹個仔都有出手。我妹即刻講話係呀，學校都有講話係對家個細路仔講只不過係唔小心整到佢個仔，佢就還手打返佢。所以我咪話正正咪就係因為大家各有各講，而且又冇人睇到，學校唯一可以知道嘅事實，就係兩個都有出手，基於呢一點所以學校覺得最公道嘅做法就係一齊記過。因為係呢個環境之下，其實學校都好難做，因為各有各講，但係在於學校立場嚟講，其實出手就已經係唔啱。所以你亦都好難話學校有啲乜嘢做錯。另一方面如果去學校再提呢件事，畀阿仔一個錯覺，好似係幫佢出頭，但係換一個角度睇，就係只不過係沒完沒了咁搞落去，最終只不過令阿仔繼續鑽牛角尖。我話與其係咁不如集中處理阿仔而家嘅心情仲好，因為佢覺得唔抵，所以我哋都要理解佢呢個諗法，但係更重要嘅係點樣幫佢放低同向前，因為事實有出手係改變唔到嘅事實，佢話係自衛，但係對家唔會係咁講，我話就算呢件事最終報警，其實警察都會因為大家各有各講，最終可能只不過係一齊告毆鬥或者叫你兩個和解，如果告毆鬥咪上到法庭睇下個官信邊個。而呀仔話畀人打唔通唔還手任得佢打，我話雖然係好似好蠢咁，但係如果畀人打即刻瞓低或者即刻走，咁成件事嘅道理就喺曬自己嗰邊，到時要報警都得，由於阿仔係受害者所以學校就一定要幫佢。但係今次件事因為事實係阿仔都有出到手，只要有出手就好難再分邊個係受害者，因為對家都可能話畀佢個仔打傷。

所以我同呀妹講我話，最重要而家都係處理阿仔嘅心情問題，多啲用理解同埋體諒嘅說話，但係亦都應該要佢明白任何情況下出手都只不過係自己蝕底，如果再沒完沒了咁諗落去，鑽牛角尖最終受影響嘅都係自己。所以而家最重要嘅係同呀仔處理情緒同埋教佢點樣放低成件事，因為事實自己有出手係真係有啲理虧。如果呢個時間家長繼續幫佢同學校糾纏，成件事最終只不過係令到個細路仔一路都放低唔到。我明白遇到呢啲情況，家長都希望幫仔女出頭，還返自己仔女一個公道。但係作為家長，我哋自己都要衡量值唔值得咁樣做落去，就好似我個姨甥仔呢次呢件事咁，其實我覺得學校喺冇乜證據嘅情況之下，已經盡量用一個相對公平嘅方法去處理。所以我仍然都係覺得再糾纏落去不如教佢學會放低同埋吸取教訓仲好。